致各位等緊放榜嘅同事們
工作就好似人生中嘅其中一班航班
但而家唔係環港flycation
與其將著眼點放係航程本身
不如嚮往一下抵達目的地後嘅美好光景
有幸繼續乘搭直航機嘅你
要記得可以留低並唔係因為公司嘅皇恩浩蕩
只係單純嘅受薪辦事 明買明賣
無需要心存感激 更加唔需要卑躬屈膝
未受種種天災人禍困擾之前
公司已經唔係乜野良心企業
以後一定會更苛刻 更涼薄
但係就算身處最惡劣嘅氣流之中
要緊守自己嘅底線 不平則鳴
要緊記自己嘅初衷 潔身自愛
需要清關再繼續餘下旅程嘅你
公司對你嘅栽培教導
係安全訓練之後經已完滿結束
過往運用嘅溝通技巧 團隊合作 應變能力 危機處理 EQ培育 體能鍛煉 國際視野... 等等等等
全部都係靠你自己一步一步 有血有汗咁領悟返黎
所以唔好妄自菲薄
覺得自己除左飛之外就乜都唔識
呢d經驗係任何行業 任何工種
甚至人生路上都彌足珍貴
相信係各位嘅飛行生涯當中
遇過好多好好嘅同事同乘客
同時亦時運低撞過唔少臭西
好中有壞 福禍相依
係過程中帶走幾多 放低幾多由你話事
及後點樣去影響身邊嘅人 亦由你作主
希望呢個專頁曾經對大家有所啟發 有所鼓勵
各位同事 各位戰友 各位乘客 各位讀者
Thank you for the flight
我地江湖再見
Search